Ji Bo Kurdistaneke Serbixwe - Lêkolîn / Gotar

(AMED)

kurdistannetew.net > Lêkolîn / Gotar > Serxwebûn / Polîtîk

Ji Bo Kurdistaneke Serbixwe
S. Sulêvanî

Rebendan 2005

Her kes dizane ku milletê kurd di rewşeke taybetî, nazik û gelek dijwar de derbas dibe. Vaye helbijartinên Iraq di dawiya vê mehê de cih digrin. Her çend ne sedîsed e ew helbijartin pêkbê jiber gef û baykot kirina hine grup û partiyên Sunniyan û rewşa xirab û tevlîhev li Iraqa erebî. Rewşa kurd û ereb li Iraq nuha ewqas cudaye û ji hev dûr e ku weke şev û roj e, erd û asman e. Kurd vê yekê baş dizanin û digel vê jî tiştek nakin da maksîmal serkeftinan bi dest bixin. Pisyar li vir ew e gelo ev helbijartinên han wê di xizmeta kurdan de be, yan na? Bi baweriya min Na, bi kêmî ne bi vî rengê ku kurd ketine helbijartinan. Di van helbijartinan de kurd wê tenê hukumeta senterî li Bexda bihêz bike, desalat û şeriyetê bide ereban. Kurd wê hukumetekê bihêz bike ku ne amadeye mafên kurdan bide. Ew naxwazin kurd weke wan serbilind bijî lê tenê xêr û bereketên Kurdistan dixwazin, sererd û binerdên wê dixwazin.

Birêz Fewzî Etruşî, yek ji berpirsên PDK ye û ji nizîk ve peywendiyên nav kurd û ereban dişopîne û ew wan baş nas dike. Ew di civîneke ser Referandomê dibêje:- ”Ereb ne amade ne bi Kurdan re di Iraqeke federal de bimînin. Û dema ku behsa federasyonê dibe canê wan dilerize” Erê ger ereb ne amade be bi Iraqeke federal digel kurdan bijîn, ew ê çawa be ger kurd behsa Kurdistaneke serbixwe bike?!! Û çima kurd ewende serê xwe bi kêşe û problema Iraq û ereban ve diêşîne? Iraq qet pirsgirêkên kurd çareser nake û birînên me kurdan derman nake. Kurdên başur dizanin çi dixwazin lê çend mixabin partiyên kurdî ku serkêşîya başur dikin, serkêşîya daxwazên kurd nake! Ez vegerim ser gotinên birêz Etruşî. Ew li cihek din di civîna tevgera Referandomê li bajarê Bonnê diyar dike û dibêje ku di encama referandumê de ew gihiştine wê baweriyê ku li Başûrê Kurdistanê tu caran Kurd naxwazein ligel miletê Ereb di Iraqeke nedemokrat de bijîn. Mirov baş dizane ku ne Iraq û ne ereb, qet nabin demokrat bi kêmî di perspektîvek diyar de. A wî demî çima kurd û partiyên wî, delîvên xwe dikujin û wextê xwe bi valayî derbas dikin ger nebêjim ew xwe û milletê xwe dikujin.

Nuha delîva avakirina Kurdistaneke serbixwe û azad hatiye ber devê kurdan û ergê ser milê partiyên kurd ewe ku tevger bikin bo vê armanca pîroz. Partîyên kurdî û hevalgirên wan, advokatiya tirk, faris û ereban dikin û dibêjin “Kurdistaneke serbixwe xewn e û ku realiteta welat û herêm rê nade bo pêşveçuneke wilo” û gotinên ji vî rengî. Ew ereban sor dikin û aql didin wan da mafê kurd nedin, ew hêz û cergê didin ereb û dagirkerên Kurdistan ku gotina wan raste. Jixwe her kes dizane ku maf nayê dan ew tê stendin! Bila kurd qet li benda ereb, turk, faris û heya Amrîka jî nebin ku mafê kurd bidin. Politîk, berjewendî ye û nuha berjewendîya Amrîka bi kurd heye, gelo çima kurd qazanc ji vê yekê nake?! Û çima kurd nikare xwe bisepîne (ferz bike) da kêşeya Mosul û Kerkuk çareser bikin? Çima wan hişt bo pêşerojeka nediyar? Û çima kurdên Mosul, Kerkuk, Xaniqîn û gelek deverên din nikarin dengê xwe bidin bo parlaman Kurdistan?

Îro li Iraq dostên Amrîka jibilî kurdan kes nîne û hewcedariya Amrîka bi kurdan heye û digel hindê ew çi pîte û giringiyê nade kurdan. Ambasadorê amrîkî li Anqara Erik Edelman dibêje:-“Amrîka û Turkiye weke prinsip li hevkirina ser Iraqê ku ew bimîne welatekê yekgirtî û jiber hindê jî em dij pêkvegirêdana bajarê Kerkukê bi herêma autonom ya Kurdistana Iraqê ne û me statuyeke taybet da wê (Kerkuk s.s.). Çawa ku helbijartin li tevayî Iraqê heye gereke Kerkuk jî bikeve helbijartinan. Ev e helwêsta hevbeş e, ya Amrîka û Turkiye û me ew gotîye Barzanî û Talebanî”. Ev gotinên han hatin kirin çend rojan piştî êreşa Amrîka ser Hewlêrê (05/01/2005). Bêgoman wek her car kurd qet bersiveke tûnd û tûj diayr nake. Ger kurd hevkriya xwe qut bike digel Amrîka yan kêm bike weke protesto û pişta xwe bi gel û daxwazên gel ve girêbide, a wî katî Amrîka wê nerxekê bide kurdan û rêz û hurmeta xwe ji wan re nîşan bide. Nexwe qet tiştek bi “belê ezbenî” û “belku” nabe!

Li vir pêwistî bi dengê gel heye. Çav û hîmên her gelekê, intelektuel û ronakbîrên wî ne. Civata bê intelektuel pêşnakeve û pêşketin jî bi rexneyên aza, zanistî û objektîv dibe. Bi agahdariyên rast û durust dibe. Vekirina çavên gel ser mafên xwe yên xwezayî wek her milletekê din bi avakirina dewleta xwe ya azad û serbixwe, karê intelektuelê kurd e. Dengê kurdan hindî diçe bilind dibe û êdî welatparêzên kurd aşkere daxwaza dewleta xwe ya serbixwe dikin.

Çima Kurdistaneke serbixwe?

Li jêr hine fakt û rastî derbarê kurd bi giştî û bi taybetî başurê welat. Têde qencî û xalên posetîv xwe didin pêş û diyar dibe ka çend baş dibe bo kurdan ger kurd gavên xurt bavêjin bo Kurdistaneke serbixwe. Mirov dikare wan wek hincet û argumentasyon jî bikar bîne digel dost û dijminên kurd.

1. Mafê kurdan yê herî xwezayî ye ku çarenusa xwe bi destê xwe diyar bike. Ev mafê han di paragrafên YN( Yekitiya Netewan) hatiye nivêsîn

2. Kurdistana Serbixwe wê rê bigre ber komkujiya kurdan di pêşerojê de û kes nikare wisa bi hêsanî kurdan û kultura wan bikuje û jenosid bike

3. Milletê kurd mezintirîn milletê cihane bê dewlet û ev jî bêmafî û neheqîyek mezin e ser kurdan tê kirin. Kurd nema vê bê dadiyê qebul bikin û ew dewleta xwe dixwazin

4. Hukumeta Iraqê, sistem û zagonên wê qet mafê kurdan nade. Ew nîv soz û peymanên bidin kurdan ser kaxez, têra azadiya mirovê kurd nake.

5. Kurd milletekê cudaye ji ereb her wek nijat, ziman, mentalitet û têgehiştin û rûdanên li Iraqa ereb diqewimin baştirîn girov û delîl e bo vê yekê

6. Nabe em xwe bi Iraqê ve girê bidin. Xem, êş û derdên me kurdan, Kurdistan û paşeroja wê ye

7. Problem û kêşa kurd nema bimîne problema navxweyî dewletekê be

8. Dengê kurd û biyanî bilind dibe bo Kurdistaneke serbixwe. Xwendevan û çavdêrê politikî vê baş dibîne nexasim di dema dawî de.9. Iraq dewleteke dagirker û çêkirî ye û ew qet nabe bersiv bo hêvî û daxwazên kurd

10. Iraq qet nabe dewleteke demokrat ku kurd û ereb têde wekhev bijîn. Ev xewneke absurd e, bila kes serê xwe pêve neêşînin.

11. Yekitîya axa Iraq ne ewqas pîroz e ku xwîna xelkê bêguneh bo wê yekitîyê bê rijandin. Jiyana bi hev re bi zorê nabe

12. Tevgera referandom wê rêxweşker be bi nêzikî du milyonan (1 732 535) nav wek tevgereke sivîl û nujen. Teymura Rojhelat, Eriteria, Çekoslovakia û gelek derên din ku bi awakê aştiyane cudabûn. Kurd jî dikarin bibin mînak.

13. politîka puk pdk ne di xizmeta kurdan de ye ger her hewl bidin kurdan bixin zindana bi navê Iraq û yekitiya wê bi awayekê be, biparêzin. Daxwaz û hêvîya kurdên başur Kurdistaneke serbixwe û azad e.

Dijatî û dek û dolabên dagirkerên Kurdistan çi dibin bila bibin, ew her çend sîxur û ajanên kurd û xeynî kurd bide karkirin dij avakirina dewleta kurdî; Kurdistana serbixwe wê her bê avakirin zû yan dereng. Çavê 50 milyon kurd li wir e û hêvîya wan bi wî beşê welatê me, mezin e. Ew wê wek bingeh dibînin bo paşerojeke geş, azad û serbixwe. Intelektuelê kurd dikare bibe pêşeng, destek alîker û rêveng di vî warî de. Hêjayî gotinê ye ku hine intelektualên başur ji bazinê bêdengiyê û nenerx kirina şaşiyên kesên berpirsiyar û partîyan; derketine û ew psikolojiya tirs û parastina interesên xwe yên kesanî şikandine.

Banga me li welatparêzên kurd, intelektuel û pisporên kurd ku berpirsiyarîya xwe ya dîrokî rakin ser milê xwe. Dem hatîye guherîn, mirovê kurd hatiye guherîn, rewşa Kurdistan û cihan jî hatiye guherîn û jiber hindê jî pêwiste ronakbîr, partî û serokên kurd jî duf rewşa taze ya Kurdistan û cihan tevbigerin û hewlbidin daxwaza milletê kurd bicih bînin. Intelektuelên kurd gereke bi azayî dij prapaganda, dezinformasyon, derew û ajîtasyonên vala û bê bingeh derkevin. Jixwe ev yeka han fonksiyona herî bi rumet ya intelektualên kurd e û rola wan ya durust li vir tê xuya kirin.

Hemû naveroka beşa Lêkolîn/Gotar »

PEYWENDÎDAR

RÛPEL

» BIŞÎNE

» BINIVSÎNE

» A A

Reklam

REKLAM

rss feed Hawar Soft